സാമാന്യ മര്യാദ മറക്കുന്നവര്‍...

നമ്മുടെ വാര്ത്താ ചാനലുകളിലെ ചില വാര്ത്താ വായനക്കാരെ പറ്റിയാണിത്‌ .

വാര്ത്താ വായന എന്ന് പറയാമോ എന്നറിയില്ല .കാരണം നൂതന സാങ്കേതിക വിദ്യകള്‍ ഉപയോഗിച്ച്

മിക്കവാറും സംഭവങ്ങള്‍ നമ്മെ "ലൈവായി " കാണിക്കുകയല്ലേ ?തിരുവനന്തപുരത്ത് യൂത്ത് കോണ്ഗ്രസ് പ്രവര്‍ത്തകരും പോലീസുമായി ഉണ്ടായ തെരുവ് യുദ്ധം തല്‍സമയം സംപ്രേഷണം ചെയ്തതിനൊപ്പം

നേതാക്കള്‍ക്ക് പരസ്പരം വാക്കേറ്റം നടത്താനും പ്രമുഖ ചാനല്‍ അവസരം കൊടുത്തു.വാക്കേറ്റം മുറുകുമ്പോള്‍ ന്യൂസ് റീഡര്‍ ഇടപെട്ട് പുതിയൊരു വിഷയം ഉന്നയിക്കുന്നു .പിന്നീട് അതെ പറ്റിയുള്ള വിശദീകരണം.

സാധാരണക്കാരായ ജനങ്ങള്‍ ഇത്തരം കാര്യങ്ങള്‍ ദിവസേന കണ്ടു മടുത്തു .

ഇത്തരം വിവാദ വിഷയങ്ങള്‍ അല്ലെങ്കില്‍ ദാരുണ സംഭവങ്ങള്‍ കൈകാര്യം ചെയ്യുമ്പോള്‍ ജനങ്ങളോട് തങ്ങള്‍ക്കുള്ള കടമ ഈ വാര്ത്താ ചാന്നലുകളും വാര്ത്താ വായനക്കാരും മറക്കുന്നു.

പലപ്പോഴും സംസ്കാര രഹിതമായ ക്രൂരമായ ചോദ്യങ്ങള്‍, ഒരു ഉദാഹരണം എടുത്തു പറയുക ബുദ്ധിമുട്ടാണ് .

അടുത്തിടെ കണ്ട ഒരു കാര്യം ഓര്‍ക്കുന്നു .കൊല്ലത്ത് ട്രെയിന്‍ കയറി പെണ്‍കുട്ടിയുടെ കൈ അറ്റ് പോയ സംഭവം

ഒരു ദിവസം മുഴുവന്‍ ആഘോഷിക്കപ്പെട്ടു. ഒരു കൈ നഷ്ടപ്പെട്ട് അബോധാവസ്ഥയില്‍ കിടക്കുന്ന കുട്ടിയുടെ ദൃശ്യങ്ങള്‍ അന്ന് മുഴുവന്‍ ചാനലില്‍ നിറഞ്ഞു.ഇനി എന്ത് കാട്ടിക്കൂട്ടുമെന്നറിയാതെ അവസാനം അവര്‍ ഒരു മഹത്തായ കാര്യം കൂടി ചെയ്തു.വര്‍ഷങ്ങള്‍ക്ക് മുന്പ് സമാനമായ അപകടം ഇതേ സ്ഥലത്തു നടന്നിരുന്നു.

ആ അപകടത്തില്‍ രണ്ടു പെണ്‍കുട്ടികള്‍ മരിക്കുകയും ഒരാള്ക്ക് കാല്‍ നഷ്ടപെടുകയും ചെയ്തു.കാല്‍ നഷ്ടപ്പെട്ടു ഇപ്പോഴും വീട്ടില്‍ കഴിയുന്ന പെണ്കുട്ടിയെ ഫോണില്‍ വിളിക്കുന്നു. ഒരു ഇരയെ കിട്ടിയ സന്തോഷത്തില്‍ നമ്മുടെ റീഡര്‍ ചോദിക്കുന്നു? " വീണ്ടും അപകടം ആവര്‍ത്തിച്ചിരിക്കുകയാണ് ...ഇപ്പോള്‍ എന്ത് തോന്നുന്നു ??"



ഈ ചോദ്യത്തെ പറ്റി എന്ത് തോന്നുന്നു ??



ഇതിന്റെ ഔചിത്യവും പ്രാധാന്യവും എത്ര ആലോചിച്ചിട്ടും മനസ്സിലായില്ല .ഈ അപകടം ആവര്‍ത്തിക്കാന്‍

കാരണമായ വ്യവസ്ഥിതിയെ ചോദ്യം ചെയ്യാനുള്ള അവകാശം ഇവര്‍ക്കില്ലേ? എന്ത് കൊണ്ട് അത് ചെയ്യുന്നില്ല ??

ആ ചോദ്യം വീണ്ടും മുഴങ്ങുന്നു

'എന്ത് തോന്നുന്നു?